କେନ୍ଦ୍ର ପେଟ୍ରୋଲିୟମ ଏବଂ ପ୍ରାକୃତିକ ବାଷ୍ପ ତଥା ଇସ୍ପାତ ମନ୍ତ୍ରୀ ଶ୍ରୀ ଧର୍ମେନ୍ଦ୍ର ପ୍ରଧାନ ଆଜି ୱେବିନାର ମାଧ୍ୟମରେ 1500ରୁ ଅଧିକ ପ୍ରଧାନମନ୍ତ୍ରୀ ଉଜ୍ଜ୍ଵଳା ଯୋଜନା ହିତାଧିକାରୀ, ଗ୍ୟାସ ବିତରକ ଏବଂ ଓଏମସି ଅଧିକାରୀଙ୍କ ସହ ମତ ବିନିମୟ କରିଛନ୍ତି  ।

ଶ୍ରୀ ପ୍ରଧାନ କହିଛନ୍ତି ଯେ, ପ୍ରଧାନମନ୍ତ୍ରୀ ଉଜ୍ଜ୍ଵଳା ଯୋଜନା (ପିଏମୟୁୱାଇ) ଏହାର ସଫଳ ଯାତ୍ରାର ଚାରି ବର୍ଷ ପୂରଣ କରିସାରିଛି, ଯାହାଦ୍ଵାରା 8 କୋଟିରୁ ଅଧିକ ଗରିବ ଏବଂ ବଞ୍ଚିତ ପରିବାରର ଜୀବନରେ ଉନ୍ନତି ଆସିଛି । ମନ୍ତ୍ରୀ କହିଛନ୍ତି ଯେ, କୋଭିଡ-19 ବିଶ୍ଵର ସମସ୍ତ ରାଷ୍ଟ୍ର ଉପରେ ପ୍ରଭାବ ପକାଇଛି ଏବଂ ଧନୀ ଲୋକ ମଧ୍ୟ ଏଥିରୁ ରକ୍ଷା ପାଇନାହାନ୍ତି ।  ଭାରତ ବିଭିନ୍ନ ଉପାୟରେ ମହାମାରୀ ସହ ଲଢେଇ କରୁଛି । କିନ୍ତୁ ଏଥିସହିତ ଗରିବ ଏବଂ ନିଷ୍ପୀଡିତଙ୍କ ସ୍ୱାର୍ଥ ପ୍ରତି ଯତ୍ନ ନିଆଯାଉଛି ଏବଂ ବହୁ ସଂଖ୍ୟାରେ ରିଲିଫ ଓ ସହାୟତା ପଦକ୍ଷେପର ଘୋଷଣା କରାଯାଇଛି । ମନ୍ତ୍ରୀ କହିଛନ୍ତି ଯେ, ସଙ୍କଟର ପ୍ରଥମ ଦିନରେ ମୋଦୀ ସରକାର ପ୍ରଧାନମନ୍ତ୍ରୀ ଗରିବ କଲ୍ୟାଣ ଯୋଜନା ଘୋଷଣା କରିଛନ୍ତି ଏବଂ ଏକ ଗୁରୁତ୍ୱପୂର୍ଣ୍ଣ ଉପାଦାନ ହେଉଛି ପିଏମୟୁୱାଇ ହିତାଧିକାରୀଙ୍କୁ 3 ମାସ ପାଇଁ ମାଗଣା ଗ୍ୟାସ ସିଲିଣ୍ଡର ଯୋଗାଇବା । ସେ କହିଛନ୍ତି ଯେ, ହିତାଧିକାରୀଙ୍କ ଆକାଉଣ୍ଟରେ ଡାଇରେକ୍ଟ ବେନିଫିଟ ଟ୍ରାନ୍ସଫର (ଡିବିଟି) ମାଧ୍ୟମରେ 8,432 କୋଟିରୁ ଅଧିକ ଟଙ୍କା ପଇଠ ହୋଇଛି । ଏପର୍ଯ୍ୟନ୍ତ, 6.28 କୋଟିରୁ ଅଧିକ ପିଏମୟୁୱାଇ ହିତାଧିକାରୀ ମାଗଣା ସିଲିଣ୍ଡର ପାଇଛନ୍ତି ।

ସଙ୍କଟ ସମୟରେ ଏଲପିଜି ସିଲିଣ୍ଡର ଉତ୍ପାଦନ, ଆମଦାନୀ ଏବଂ ବିତରଣକୁ ବଜାୟ ରଖିବାରେ ଓଏମସି ଅଧିକାରୀଙ୍କ ଭୂମିକାକୁ ମନ୍ତ୍ରୀ ପ୍ରଶଂସା କରିଥିଲେ । ସେ କହିଥିଲେ ଯେ, ଅନ୍ୟ ଦେଶ ତୁଳନାରେ କୋଭିଡ-19 ବିରୋଧି ଲଢେଇରେ ଭାରତର ସ୍ଥିତି ଭଲ ଅଛି । ସେ ଆହୁରି କହିଥିଲେ ଯେ, ଏଥିପାଇଁ ଶ୍ରେୟ ପ୍ରଧାନମନ୍ତ୍ରୀଙ୍କୁ, କାରଣ ତାଙ୍କ ସାହସିକ ଏବଂ ସଠିକ ନିଷ୍ପତ୍ତି ପାଇଁ । ସେ କହିଛନ୍ତି ଯେ, ବର୍ତ୍ତମାନ ଦେଶର ଅର୍ଥବ୍ୟବସ୍ଥା ଓ ରୋଜଗାରକ୍ଷମକୁ ପୁନର୍ଜୀବିତ କରିବାର ସମୟ ଆସିଛି । କୋଭିଡ-19 ବିରୋଧି ଲଢେଇରେ ଭାରତୀୟ ଅର୍ଥବ୍ୟବସ୍ଥାକୁ ସୁଦୃଢ କରିବା ପାଇଁ 20 ଲକ୍ଷ କୋଟି ଟଙ୍କାର ପ୍ୟାକେଜ ନେଇ ଆସିଥିବାରୁ ସେ ପ୍ରଧାନମନ୍ତ୍ରୀ ଏବଂ ଅର୍ଥମନ୍ତ୍ରୀଙ୍କୁ କୃତଜ୍ଞତା ଜଣାଇଥିଲେ । ସେ କହିଛନ୍ତି ଯେ, ପ୍ୟାକେଜ ଅଧୀନରେ ଅର୍ଥନୀତିର ସମସ୍ତ କ୍ଷେତ୍ର ଏବଂ ସମାଜର ସମସ୍ତ ବିଭାଗକୁ ରିଲିଫ ଯୋଗାଇ ଦିଆଯାଉଛି । ଦେଶରେ ଆତ୍ମନିର୍ଭର ଅଭିଯାନ ଆରମ୍ଭ କରିବାକୁ ପ୍ରଧାନମନ୍ତ୍ରୀଙ୍କ ଘୋଷଣାକୁ ସେ ସ୍ୱାଗତ କରିଛନ୍ତି, ଯଦ୍ୱାରା ଦେଶରେ ଘରୋଇ ଉତ୍ପାଦନକୁ ଉତ୍ସାହିତ କରିବା ସହିତ ଆମକୁ ଆତ୍ମନିର୍ଭରଶୀଳ କରିବାରେ ସହାୟକ ହେବ ।

ପରେ, ପିଏମୟୁୱାଇ ହିତାଧିକାରୀମାନେ ସେମାନଙ୍କର ଅଭିଜ୍ଞତା ବାଣ୍ଟିଥିଲେ । ଅଦୃଶ୍ୟ ସଙ୍କଟ ସମୟରେ ଏଭଳି ସହାୟତା ପ୍ରଦାନ କରିଥିବାରୁ ସେମାନେ ସରକାରଙ୍କୁ କୃତଜ୍ଞତା ଜଣାଇଥିଲେ । ସରକାରଙ୍କ ମାଗଣା ଗ୍ୟାସ ସିଲିଣ୍ଡର ଯୋଗାଣ କିପରି ସେମାନଙ୍କ ଜୀବନରେ ପରିବର୍ତ୍ତନ ଆଣିପାରିଥିଲା, ସେନେଇ ଅନେକ ହିତାଧିକାରୀ ସେମାନଙ୍କ କାହାଣୀ ବାଣ୍ଟିଥିଲେ । ସେମାନଙ୍କ ମଧ୍ୟରୁ ଅନେକ କହିଥିଲେ ଯେ, ସେମାନଙ୍କ ଘରେ ଏଲପିଜି ସିଲିଣ୍ଡରର ଉପଲବ୍ଧତା କେବଳ ସେମାନଙ୍କ ଜୀବନକୁ ସୁବିଧାଜନକ, ସୁସ୍ଥ, ନିରାପଦ ଏବଂ ନିରାପଦ କରିନାହିଁ ବରଂ ସେମାନଙ୍କୁ ଇନ୍ଧନ ସଂଗ୍ରହର କଷ୍ଟରୁ ମୁକ୍ତ କରିଛି ଏବଂ ମୂଲ୍ୟବାନ ସମୟ ପ୍ରଦାନ କରିଛି । ସେମାନଙ୍କ ମଧ୍ୟରୁ ଅନେକ କହିଥିଲେ ଯେ, ବର୍ତ୍ତମାନ ଖୁବ କମ ସମୟ ମଧ୍ୟରେ ରିଫିଲ ସିଲିଣ୍ଡର ପାଇପାରୁଛନ୍ତି । କୋଭିଡ-19 ମହାମାରୀ ଏବଂ ଲକଡାଉନ ସମୟରେ ସିଲିଣ୍ଡର ଯୋଗାଣ କ୍ଷେତ୍ରରେ କାର୍ଯ୍ୟ କରୁଥିବା ଲୋକମାନଙ୍କୁ କରୋନା ଯୋଦ୍ଧା ଭାବେ ଅଭିହିତ କରି ସେମାନଙ୍କୁ ଧନ୍ୟବାଦ ଜଣାଇଥିଲେ ।

 

**********

 

(ରିଲିଜ ଆଡି: 1624563) ପରିଦର୍ଶକ କାଉଣ୍ଟର : 294