ତେଲଙ୍ଗାନାରେ କେତେଜଣ ତବ୍ଲିଘ ଜମାତ କାର୍ଯ୍ୟକର୍ତ୍ତା କୋଭିଡ-19ରେ ସଂକ୍ରମିତ ହେବା ସମ୍ପର୍କରେ ସୂଚନା ମିଳିବା ପରେ କେନ୍ଦ୍ର ଗୃହ ମନ୍ତ୍ରଣାଳୟ ପକ୍ଷରୁ ଗତ ମାର୍ଚ୍ଚ 21, 2020ରେ ସାରା ଦେଶରେ ଥିବା ତବ୍ଲିଘ ଜମାତ କାର୍ଯ୍ୟକର୍ତ୍ତାଙ୍କ ବିବରଣୀ ସବୁରାଜ୍ୟକୁ ଯୋଗାଇ ଦିଆଯାଇଛି ।

ଅନ୍ୟ କରୋନା ସନ୍ଦିଗ୍ଧଙ୍କୁ ଚିହ୍ନଟ କରିବା, ପୃଥକ ରଖିବା ଏବଂ ସଙ୍ଗରୋଧ କରିବା ନିମନ୍ତେ ତୁରନ୍ତ ପଦକ୍ଷେପ ଗ୍ରହଣ କରାଯାଇଛି । ଗୃହ ମନ୍ତ୍ରଣାଳୟ ପକ୍ଷରୁ ସମସ୍ତ ରାଜ୍ୟର ମୁଖ୍ୟ ଶାସନ ସଚିବ ଓ ଡିଜିପିଙ୍କ ସମେତ ଦିଲ୍ଲୀ ପୋଲିସ କମିଶନରଙ୍କୁ ନିର୍ଦ୍ଦେଶନାମା ଜାରି କରାଯାଇଛି । ମାର୍ଚ୍ଚ 28 ଏବଂ 29ରେ ଡିପାର୍ଟମେଣ୍ଟ ଅଫ ଇଣ୍ଟେଲିଜେନ୍ସ ବ୍ୟୁରୋ (ଡିଆଇବି) ପକ୍ଷରୁ ସବୁ ରାଜ୍ୟର ପୋଲିସ ଡିଜିମାନଙ୍କୁ ମାର୍ଗଦର୍ଶିକା ମଧ୍ୟ ଜାରି କରାଯାଇଛି ।

ଇତିମଧ୍ୟରେ, ନିଜାମୁଦ୍ଦିନ ମର୍କଜରେ ରହୁଥିବା ତବ୍ଲିଘ ଜମାତ କାର୍ଯ୍ୟକର୍ତ୍ତାମାନଙ୍କୁ ରାଜ୍ୟ କର୍ତ୍ତୃପକ୍ଷ ଏବଂ ପୋଲିସ ପକ୍ଷରୁ ମେଡ଼ିକାଲ ଯାଞ୍ଚ ପାଇଁ ନିଆଯାଇଛି । ମାର୍ଚ୍ଚ 29 ସୁଦ୍ଧା 162 ଜଣ ତବ୍ଲିଘ ଜମାତ କାର୍ଯ୍ୟକର୍ତ୍ତାଙ୍କୁ ଡାକ୍ତରୀ ଯାଞ୍ଚ କରାଯାଇ ସଙ୍ଗରୋଧ କେନ୍ଦ୍ରରେ ଭର୍ତ୍ତି କରାଯାଇଛି । ବର୍ତ୍ତମାନ ସୁଦ୍ଧା 1339 ତବ୍ଲିଘ ଜମାତ କାର୍ଯ୍ୟକର୍ତ୍ତାଙ୍କୁ ନାରେଲା, ସୁଲତାନପୁରୀ ଓ ବକ୍କରୱାଲା ସଙ୍ଗରୋଧ କେନ୍ଦ୍ର ସମେତ ଏଲଏନଜେପି, ଆରଜିଏସଏସ, ଜିଟିବି, ଡିଡିୟୁ ହସ୍ପିଟାଲ ଓ ଏମ୍ସ, ଝାଜ୍ଜର ଆଦି ଡାକ୍ତରଖାନାକୁ ସ୍ଥାନାନ୍ତର କରାଯାଇଛି । ଅବଶିଷ୍ଟଙ୍କ ଠାରେ କୋଭିଡ-19 ସଂକ୍ରମଣର ଡାକ୍ତରୀ ଯାଞ୍ଚ କରାଯାଉଛି ।

ସାଧାରଣତଃ ତବ୍ଲିଘ ଦଳର ଅଂଶବିଶେଷ ଭାବେ ଭାରତକୁ ଆସୁଥିବା ବିଦେଶୀ ନାଗରିକମାନେ ପର୍ଯ୍ୟଟକ ଭିସାର ଉପଯୋଗ କରିଥାନ୍ତି । ତେବେ ପର୍ଯ୍ୟଟକ ଭିସାରେ ଆସି ସେମାନେ ଧର୍ମପ୍ରଚାର କାର୍ଯ୍ୟରେ ନିୟୋଜିତ ରହିପାରିବେ ନାହିଁ ବୋଲି ଗୃହ ମନ୍ତ୍ରଣାଳୟ ପକ୍ଷରୁ ନିର୍ଦ୍ଦେଶନାମା ଜାରି କରାଯାଇଛି । ସମସ୍ତ ବିଦେଶୀ ତବ୍ଲିଘ ଜମାତ କାର୍ଯ୍ୟକର୍ତ୍ତାଙ୍କ ଭିସାକୁ ରାଜ୍ୟ ପୋଲିସ ପକ୍ଷରୁ ଯାଞ୍ଚ କରାଯାଉଛି । ସେମାନେ ଭିସା ନିୟମ ଉଲ୍ଲଙ୍ଘନ କରିଥିବା ଧରାପଡ଼ିଲେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ । 

ସୂଚନାଯୋଗ୍ୟ ଯେ ଦିଲ୍ଲୀର ନିଜାମୁଦ୍ଦିନ ଠାରେ ତବ୍ଲିଘ ଜମାତର ମୁଖ୍ୟାଳୟ (ମର୍କଜ) ରହିଛି । ଧାର୍ମିକ ଉଦ୍ଦେଶ୍ୟ ନେଇ ସାରା ଦେଶରୁ ଏବଂ ଦେଶବାହାରୁ ଧର୍ମନିଷ୍ଠ ମୁସଲିମମାନେ ଏଠାକୁ ଆସିଥାନ୍ତି । ଏମାନଙ୍କ ମଧ୍ୟରୁ କେତେକ ପୃଥକ ଗୋଷ୍ଠୀରେ ବିଭକ୍ତ ହୋଇ ଦେଶର ବିଭିନ୍ନ ପ୍ରାନ୍ତକୁ ତବ୍ଲିଘ କାର୍ଯ୍ୟକଳାପ ପାଇଁ ଯାଇଥାନ୍ତି । ବର୍ଷତମାମ ଏଭଳି ପ୍ରକ୍ରିୟା ଜାରି ରହିଥାଏ ।

ମାର୍ଚ୍ଚ 21ରେ ପାଖାପାଖି 824 ଜଣ ବିଦେଶୀ ତବ୍ଲିଘ ଜମାତ କାର୍ଯ୍ୟକର୍ତ୍ତା ଧର୍ମ ପ୍ରଚାର ଉଦ୍ଦେଶ୍ୟରେ ଦେଶର ବିଭିନ୍ନ ପ୍ରାନ୍ତକୁ ଯାଇଥିଲେ। ଏହାଛଡ଼ା ମର୍କଜରେ 216 ଜଣ ବିଦେଶୀ ନାଗରିକ ରହିଥିଲେ । ଏହାବ୍ୟତୀତ 1500ରୁ ଊର୍ଦ୍ଧ୍ଵ ଭାରତୀୟ ତବ୍ଲିଘ କାର୍ଯ୍ୟକର୍ତ୍ତା ମର୍କଜରେ ରହୁଥିବା ସମୟରେ 2100 ଭାରତୀୟ ତବ୍ଲିଘ କାର୍ଯ୍ୟକର୍ତ୍ତା ଧର୍ମପ୍ରଚାର ଉଦ୍ଦେଶ୍ୟରେ ଦେଶର ବିଭିନ୍ନ ପ୍ରାନ୍ତକୁ ଗସ୍ତ କରିଥିଲେ । ମାର୍ଚ୍ଚ 23ରେ କଡ଼ାକଡ଼ି ଭାବେ ଲକଡାଉନ ଜାରି ହେବା ପରେ ଦିଲ୍ଲୀ ଭିତରେ ଏବଂ ବାହାରେ ରାଜ୍ୟ ସରକାର ଏବଂ ପୋଲିସ ପକ୍ଷରୁ କଟକଣା ଜାରି କରାଯାଇଥିଲା । ଫଳରେ ତବ୍ଲିଘ କାର୍ଯ୍ୟ ବନ୍ଦ ହୋଇଥିଲା ।

**********