କର୍ମଚାରୀ ଭବିଷ୍ୟନିଧି ସଂଗଠନ ଇପିଏଫଓ ଅନ୍ତର୍ଭୁକ୍ତ ସଂଗଠିତ କ୍ଷେତ୍ରର କର୍ମଚାରୀଙ୍କ ପାଇଁ ଉଦ୍ଦିଷ୍ଟ ଇପିଏଫ ଯୋଜନା 1952ର ସଂଶୋଧନ କରାଯାଇଛି । କେନ୍ଦ୍ର ଶ୍ରମ ଓ ନିଯୁକ୍ତି ମନ୍ତ୍ରଣାଳୟ ପକ୍ଷରୁ ଏ ସଂପର୍କରେ ଜାରି ହୋଇଥିବା ବିଜ୍ଞପ୍ତିରେ କୁହାଯାଇଛି ଯେ ସାମ୍ପ୍ରତିକ କରୋନା ସଂକ୍ରମଣକୁ ଦୃଷ୍ଟିରେ ରଖି ଇପିଏଫଓ କର୍ମଚାରୀଙ୍କୁ ନିଜ ଭବିଷ୍ୟ ପାଣ୍ଠିରୁ ଅଣ ପରିଶୋଧଯୋଗ୍ୟ ଅଗ୍ରୀମ (ନନ ରିଫଣ୍ଡେବଲ ଆଡଭାନ୍ସ) ଉଠାଣର ସୁଯୋଗ ଦେବାପାଇଁ ଏହି ବ୍ୟବସ୍ଥା କରାଯାଇଛି । ବିଜ୍ଞପ୍ତି ଅନୁସାରେ ଇପିଏଫ୍ଓ ସଦସ୍ୟ ନିଜ ଭବିଷ୍ୟନିଧି ପାଣ୍ଠିରୁ ଏକକାଳୀନ ତିନିମାସର ବେତନ ଉଠାଇପାରିବେ । ଏଥିରେ ମୂଳ ଦରମା ଓ ମହଙ୍ଗା ଭତ୍ତାକୁ କେବଳ ହିସାବକୁ ନିଆଯିବ । ଏହାଛଡ଼ା ପାଣ୍ଠିର ସଦସ୍ୟ ଚାହିଁଲେ ନିଜ ଖାତାରେ ଜମାଥିବା ବ୍ୟକ୍ତିଗତ ରାଶିର ସର୍ବାଧିକ 75 ଶତକଡା ଉଠାଇପାରିବେ । ଏହି ଦୁଇଟି ଉଠାଣ ଗୁଡ଼ିକରୁ ମାତ୍ର ଗୋଟିଏ ବିକଳ୍ପ ଇପିଏଓଫ ସଦସ୍ୟ ପାଇବେ ଏବଂ ସେଥିପାଇଁ ସେମାନଙ୍କୁ ପରବର୍ତ୍ତୀ ସମୟରେ ସୁଝିବାକୁ ପଡ଼ିବ ନାହିଁ । ଏହି ସଂଶୋଧିତ ବ୍ୟବସ୍ଥାକୁ ତୁରନ୍ତ କାର୍ଯ୍ୟକାରୀ କରିବାକୁ ଶ୍ରମ ମନ୍ତ୍ରଣାଳୟ ପକ୍ଷରୁ ବିଭିନ୍ନ ପ୍ରଦେଶିକ ଓ ଆଂଚଳିକ ଅଫିସକୁ ନିର୍ଦ୍ଦେଶ ଦିଆଯାଇଛି । କରୋନାର ମୁକାବିଲା ପାଇଁ ଦେଶର ସଂଗଠିତ କ୍ଷେତ୍ରର କର୍ମଚାରୀମାନେ ଆବଶ୍ୟକ ଅର୍ଥ ସଂଗ୍ରହରେ ଯେପରି ଅସୁବିଧାର ସମ୍ମୁଖୀନ ନ ହୁଅନ୍ତି ସେଥିପାଇଁ ଶ୍ରମ ମନ୍ତ୍ରଣାଳୟ ପକ୍ଷରୁ ଏହି ପଦକ୍ଷେପ ନିଆଯାଇଛି । ସେଥିପାଇଁ ଭବିଷ୍ୟନିଧି ଆଇନ 1952ର ସଂଶୋଧନ କରାଯାଇ ପାରା 68ଏଲ ଅଧୀନରେ ଏକ ଉପପାରା (3) ଯୋଗ କରାଯାଇଛି ।

 

**********

(ରିଲିଜ ଆଡି: 1609111) ପରିଦର୍ଶକ କାଉଣ୍ଟର : 273