କ୍ୟାବିନେଟ ସଚିବାଳୟ
ବିଭିନ୍ନ ରାଜ୍ୟର ମୁଖ୍ୟ ଶାସନ ସଚିବଙ୍କ ସହିତ କୋଭିଡ-19ର ସ୍ଥିତି ସମୀକ୍ଷା କଲେ କ୍ୟାବିନେଟ ସଚିବ
• ରୋଗ ଉପରେ ଅଙ୍କୁଶ ଲଗାଇବାକୁ ନିଆଗଲା ଗୁରୁତ୍ୱପୂର୍ଣ୍ଣ ନିର୍ଣ୍ଣୟ
Posted On:
22 MAR 2020 8:38AM by PIB Bhubaneshwar
ପ୍ରଧାନମନ୍ତ୍ରୀଙ୍କ ପ୍ରମୁଖ ସଚିବ ଏବଂ କ୍ୟାବିନେଟ ସଚିବଙ୍କ ଦ୍ୱାରା ସମସ୍ତ ରାଜ୍ୟର ମୁଖ୍ୟ ଶାସନ ସଚିବମାନଙ୍କ ସହିତ ଆଜି ସକାଳୁ ଏକ ଉଚ୍ଚସ୍ତରୀୟ ବୈଠକ ଅନୁଷ୍ଠିତ ହୋଇଯାଇଛି । ଜନତା କର୍ଫ୍ୟୁ ପାଳନ ଲାଗି ମାନନୀୟ ପ୍ରଧାନମନ୍ତ୍ରୀଙ୍କ ଆହ୍ୱାନ ପ୍ରତି ଅଭୂତପୂର୍ବ ଏବଂ ସ୍ୱତଃସ୍ଫୁର୍ତ ସମର୍ଥନ ମିଳିଛି ବୋଲି ଏହି ଅବସରରେ ମୁଖ୍ୟ ଶାସନ ସଚିବମାନେ ସୂଚନା ଦେଇଥିଲେ ।
କୋଭିଡ-19ର ସଂକ୍ରମଣ ଉପରେ ଅଙ୍କୁଶ ଲଗାଇବାର ଆବଶ୍ୟକତାକୁ ଦୃଷ୍ଟିରେ ରଖି 31 ମାର୍ଚ୍ଚ, 2020 ପର୍ଯ୍ୟନ୍ତ ଆନ୍ତଃରାଜ୍ୟ ବସ ଚଳାଚଳ ଏବଂ ଅନାବଶ୍ୟକ ଯାତ୍ରୀ ପରିବହନ ଉପରେ କଟକଣା ଜାରି କରାଯିବାର ଜରୁରି ଆବଶ୍ୟକତା ଉପରେ ସହମତି ବ୍ୟକ୍ତ କରାଯାଇଥିଲା ।
ବିସ୍ତୃତ ବିଚାରବିମର୍ଶ ପରେ, କୋଭିଡ-19 ପଜିଟିଭ କିମ୍ବା ମୃତ୍ୟୁ ମାମଲା ରିପୋର୍ଟ ହୋଇଥିବା 75ଟି ଜିଲ୍ଲାରେ କେବଳ ବାଧ୍ୟତାମୂଳକ ସେବାକୁ ବାଦ ଦେଲେ ବାକିସବୁ ବନ୍ଦ ରଖିବା ନିମନ୍ତେ ରାଜ୍ୟଗୁଡ଼ିକୁ ପରାମର୍ଶ ଦିଆଯାଇଥିଲା । ରାଜ୍ୟ ସରକାର ସ୍ଥିତିକୁ ଦୃଷ୍ଟିରେ ରଖି ଏହି ପ୍ରତିବନ୍ଧକକୁ ସମ୍ପ୍ରସାରିତ କରିପାରିବେ । ଉଲ୍ଲେଖଯୋଗ୍ୟ ଯେ ଅନେକ ରାଜ୍ୟ ପୂର୍ବରୁ ଏପରି ପ୍ରତିବନ୍ଧକ ଲାଗୁ କରିସାରିଛନ୍ତି ।
ଏହି ବୈଠକରେ ନିମ୍ନଲିଖିତ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନିଆଯାଇଥିଲା:
- 31 ମାର୍ଚ୍ଚ, 2020 ପର୍ଯ୍ୟନ୍ତ ସହରାଂଚଳ ରେଳ ସେବା ସମେତ ସମସ୍ତ ରେଳ ସେବା ସ୍ଥଗିତ ରଖାଯିବ । କିନ୍ତୁ ମାଲଗାଡ଼ିକୁ ଏଥିରୁ ବାଦ ଦିଆଯିବ ।
- 31 ମାର୍ଚ୍ଚ, 2020 ପର୍ଯ୍ୟନ୍ତ ସମସ୍ତ ମେଟ୍ରୋ ରେଳ ସେବା ସ୍ଥଗିତ ରହିବ । କୋଭିଡ-19 ସଂକ୍ରମଣ କିମ୍ବା ମୃତ୍ୟୁ ମାମଲା ଚିହ୍ନଟ ହୋଇଥିବା 75ଟି ଜିଲ୍ଲାରେ ରାଜ୍ୟ ସରକାର କେବଳ ଜରୁରିକାଳୀନ ସେବା ନିମନ୍ତେ ଅନୁମତି ଦେବାର ଆଦେଶ ଜାରି କରିବେ ।
- ଆନ୍ତଃରାଜ୍ୟ ଯାତ୍ରୀ ପରିବହନ 31 ମାର୍ଚ୍ଚ, 2020 ପର୍ଯ୍ୟନ୍ତ ସ୍ଥଗିତ ।
**********
(Release ID: 1607837)
Visitor Counter : 195