தேசிய திறன் மற்றும் நுழைவுத் தேர்வான நீட் எனப்படும் தேசிய அளவிலான பொது நுழைவுத் தேர்வு, நாட்டில் உள்ள அனைத்து மருத்துவப் படிப்பிலும் சேரக் கட்டாயமாக்கப்பட்டுள்ளது. வெளிநாடுகளில் மருத்துவக் கல்வி பயின்ற இந்திய மாணவர்கள், அங்கு மருத்துவப் படிப்பை முடித்ததற்கான சான்றிதழ் பெற்ற பின்னர் இந்தியாவில் மருத்துவராக பதிவு செய்து மருத்துவம் பார்ப்பதற்கு, (FMGE) எனப்படும் தணிக்கை பரிசோதனை தேர்வில் தகுதி பெற வேண்டும். வெளிநாடுகளில் உள்ள மருத்துவ கல்வி நிறுவனங்கள் மற்றும் பல்கலைக் கழகங்களில் முறையான மதிப்பீடு அல்லது மாணவர்களின் கல்வித் திறனை பரிசோதிக்காமல் மாணவர்கள்  சேர்க்கப்படுவதால், அவர்கள் மருத்துவ கல்விக்கான திறனை பெற முடியாமல் போகிறது. அதனால்  பல மாணவர்கள் தணிக்கை பரிசோதனை தேர்வில் தோல்வி அடைவது தற்போது கவனத்திற்கு வந்துள்ளது. 

இதனையடுத்து வெளிநாடுகளில் மருத்துவக் கல்வி பயில நீட் தேர்வில் வெற்றி பெற வேண்டியது கட்டாயம் என்று 2002 ஆம் ஆண்டு தணிக்கை பரிசோதனை விதிமுறைகளில் திருத்தம் செய்ய வேண்டும் என இந்திய மருத்துவக் கவுன்சில் விடுத்த கோரிக்கையை சுகாதார அமைச்சகம் ஏற்றுக் கொண்டுள்ளது.

இதன்மூலம் இந்தியக் குடியுரிமை பெற்றவர்கள் வெளிநாடுகளில் குடியுரிமை பெற்ற  இந்தியர்கள், 2018 ஆம் ஆண்டு மே மாதத்திற்கு பின்னர், இந்தியாவுக்கு வெளியே எந்த மருத்துவக் கல்வி நிறுவனத்திலும் கல்வி பயில நீட் தேர்வில் தேர்ச்சி பெற்றிருக்க வேண்டியது அவசியமாகிறது.  அத்தகைய நபர்களுக்கு நீட் தேர்வு முடிவு தகுதிச்சான்றிதழாக கருதப்படும். மேலும் அவர்கள்  1997 ஆம் ஆண்டு மருத்துவ பட்டப்படிப்புக்கான விதிமுறைகளின் படி, எம்.பி.பி.எஸ் படிப்பில் சேர தகுதி பெற்றவர்களாகவும் இருக்க வேண்டும்.

(रिलीज़ आईडी: 1520567) आगंतुक पटल : 121