ଆର୍ମେନିଆ ରାଷ୍ଟ୍ରପତି ଶ୍ରୀ ସର୍ଜ ସାର୍ଗସିଆନ ଆଜି (ନଭେମ୍ବର 3, 2017) ରାଷ୍ଟ୍ରପତି ଭବନଠାରେ ରାଷ୍ଟ୍ରପତି ଶ୍ରୀ ରାମ ନାଥ କୋବିନ୍ଦଙ୍କୁ ସାକ୍ଷାତ କରିଛନ୍ତି ।

ଆର୍ମେନିଆ ରାଷ୍ଟ୍ରପତିଙ୍କୁ ତାଙ୍କର ପ୍ରଥମ ଭାରତ ଗସ୍ତ ଅବସରରେ ସ୍ୱାଗତ କରି ରାଷ୍ଟ୍ରପତି ଶ୍ରୀ କୋବିନ୍ଦ ଆର୍ମେନିଆ ରାଷ୍ଟ୍ରପତି ଭିତିକ ଶାସନ ବ୍ୟବସ୍ଥାରୁ ସଫଳତାର ସହ ସଂସଦୀୟ ବ୍ୟବସ୍ଥାକୁ ପରିବର୍ତ୍ତନ ଘଟାଇଥିବାରୁ ତାଙ୍କୁ ଅଭିନନ୍ଦନ ଜଣାଇଥିଲେ । ୱାର୍ଲ୍ଡ ଫୁଡ ଇଣ୍ଡିଆ ପ୍ରଦର୍ଶନୀରେ ତାଙ୍କ ଯୋଗଦାନକୁ ସେ ପ୍ରଶଂସା କରିଥିଲେ ।

ରାଷ୍ଟ୍ରପତି କହିଲେ ଯେ ଭାରତ ଓ ଆର୍ମେନିଆ ମଧ୍ୟରେ ଏକ ବିଶେଷ ସମ୍ପର୍କ ରହିଛି । ଉଭୟଙ୍କ ମଧ୍ୟରେ ଥିବା ଉଷ୍ମ ଓ ବନ୍ଧୁତ୍ୱପୂର୍ଣ୍ଣ ସମ୍ପର୍କର ଇତିହାସ ପ୍ରାଚୀନ । ଶହ ଶହ ବର୍ଷ ଧରି ଉଭୟ ରାଷ୍ଟ୍ରର ଲୋକେ ପରସ୍ପରର ସମ୍ପର୍କରେ ଅଛନ୍ତି । କୋଲକାତା, ଚେନ୍ନାଇ  ଏବଂ ଭାରତର ଅନ୍ୟାନ୍ୟ ନଗରୀମାନଙ୍କରେ ଆର୍ମେନିୟ ଭାଇଭଉଣୀମାନଙ୍କ ସହ ଆମେ ସହବସ୍ଥାନ କରିଆସିଛୁ । ଏକ ସମାନ ଐତିହ୍ୟରେ ସହଭାଗୀ ହୋଇଥିବାରୁ ଆମେ ନିଜକୁ ଗର୍ବିତ ମନେକରୁ ।

ସେହିଭଳି ଆମର ଦ୍ୱିପାକ୍ଷିକ ସମ୍ପର୍କର ନିବିଡତା ବିଷୟରେ ଉଲ୍ଲେଖ କରି ରାଷ୍ଟ୍ରପତି କହିଲେ ଯେ  ଉଭୟ ରାଷ୍ଟ୍ରଙ୍କ ମଧ୍ୟରେ ଆର୍ଥିକ ଓ ବାଣିଜ୍ୟିକ ସମ୍ପର୍କ ବୃଦ୍ଧିର ପର୍ଯ୍ୟାପ୍ତ ସୁଯୋଗ ରହିଛି । ସ୍ୱାସ୍ଥ୍ୟ କ୍ଷେତ୍ରରେ ଦ୍ୱିପାକ୍ଷିକ ସମ୍ପର୍କ ବୃଦ୍ଧିର ଯଥେଷ୍ଟ ଅବସର ଅଛି । ଆର୍ମେନିଆ ରାଷ୍ଟ୍ରପତିଙ୍କ ଏହି ଗସ୍ତ ଭାରତ-ଆର୍ମେନିଆ ସମ୍ପର୍କକୁ ଅଧିକ ଘନିଷ୍ଠ କରିବାରେ ସହାୟକ ହେବ ବୋଲି ରାଷ୍ଟ୍ରପତି ଆଶାପ୍ରକଟ କରିଥିଲେ ।

ଆର୍ମେନିଆର ୟେରେଭାନ ଷ୍ଟେଟ ୟୁନିଭରସିଟିରେ ଏକ ହିନ୍ଦୀ ଚେୟାର ଥିବାରୁ ରାଷ୍ଟ୍ରପତି ସନ୍ତୋଷ ବ୍ୟକ୍ତ କରିଥିଲେ । ଖୁବ ଶୀଘ୍ର ଆର୍ମେନିଆନ ଷ୍ଟେଟ ଇନଷ୍ଟିଚ୍ୟୁଟ ଅଫ ଫିଜିକାଲ କଲଚର ଆଣ୍ଡ ସ୍ପୋର୍ଟସଠାରେ ଏକ ଯୋଗ ଚେୟାର ପ୍ରତିଷ୍ଠା କରାଯିବ । ଏଭଳି ପ୍ରୟାସ ଉଭୟ ରାଷ୍ଟ୍ରଙ୍କ ସମ୍ପର୍କକୁ ଆହୁରି ନିବିଡ କରିବ ।

 

************

(रिलीज़ आईडी: 1509080) आगंतुक पटल : 30